لومړۍ که څلورمه !

لومړۍ که څلورمه !


  • 2 اونۍ دمخه (06/06/2021)
  • عبدالرازق "اخندزاده "
  • 143

که مقننه قوه د ټولنې د اصلاح په خاطر قوانين جوړوي او د دې لپاره چې خلک آرامه ژوند وکړي ، نو اجرايه قوه بیا دغه قوانين پلي کوي .

که چيرته خلک د دغو قوانينو خلاف کار وکړي او ټولنې ته زیان ورسوي ، قضایه قوه پرې حکم جارې کوي .

خو !                                                         که چیرته یوه قوه داسې وي چې ، هغه خلک دې ته قانع کوي ، د خلکو پروړاندې بايد څنګه چلند وکړي ؟ څنګه کولای شي چې خپل مسؤليت وپيژنې ؟ او د دې تر څنګ دا هم ورته ښيي چې يووالی مو د نجات لاره ده.

د نړۍ له پرمختګونو يې خبروي او دا هم ورته روښانه کوي چې دوی څنګه دې لوړ مقام ته رسیدای شی.

د ټولنيز او ګډ ژوند اصول ور زده کوي.

دا هغه قوه ده ، چې د ټولنې له وګړو سره صميمانه اړیکې لري .

د یوه ښه ملګري په څیر چلند ورسره کوي ، ځکه چې په خوښیو یې خوښ او په غم یې غمجنه وي.

او که چیرته وګړي د سټړیا احساس وکړي، نو دغه قوه ورته بیا تفریح برابروي؛ تر څو چې د ژوند په هر ډګر کې ورسره مله وي .

دومره مینه ورسره لري، چې یوازېتوب ته یې نه پریږدي.

نو د ټولنې وګړي هم دې مینې ته په کتو سره خپله غیږه ورته خلاصوي او هرې غوښتنې ته یې لبیک (حاضر) وایي.

د دې قوې په وینا حرکت کوي، د پرمختګ پر لور ځي ، د سیالانو سره سیالي کوي او د آسمان تر منارو خیژي .

خو !

که دغه قوه ورته د نه کولو امر وکړي، دوی هم پر خپل ځای ودریږي، که هر څومره فزیکي برخورد (د بدن د غړو پواسطه زور زیاتی کول) ورسره وشي

نو یو قدم هم نه پورته کوي .

په ریشتیا هم ژورنالیزم دی، چې په وګړو یې اغیزه تر هغو درېوو قوو (مقننه، قضايه او اجرايه ) زیاته او منونکې ده . 

په حقیقت کې که ژور نالیزم ته ارزښت ورکول شي، پاملرنه ورته وشي، وخت په وخت د مسؤلو چارواکو لخوا و څارل شي، په ایماندارۍ او مسلکي ډول خپل خدمات وړاندې کړي .

د یوه هیواد د پرمختګ لامل ګرځي او یو روښانه راتلونکی به ولري .

خو !

که همدغه قوه په وخت ونه څارل شي، په پردیو خرڅه شي، په مسلکي ډول وړاندې نشي .

نو !

د یوه هيواد د پرمختګ مخه نیسي، د دوامداره کورنیو جګړو لامل ګرځي .

او دومره مشکلات به وزیږوي چې درې واړه قوې به یې په حلولو پاتې راشي.

نو، زما په آند څلورمه قوه تر درېوو لومړۍ ده.