د اداري ژوند ښه مدیران اوسئ

د اداري ژوند ښه مدیران اوسئ


  • 2 مياشتي دمخه (01/10/2021)
  • عبدالوافي نایبزی
  • 133

۱ – تل چې درڅخه د يو کار کولو څومره تمه کېږي، هڅه وکړئ، چې له هغه ډېر ترسره کړئ. دا يوازې تر دندې مه محدودئ، هڅه باید وکړو، چې د ژوندانه په ټولو برخو کې دا ځانته اصل وگرځو. د دې اصل په پلي کولو سره به موږ په کارځای او ټولنه کې ډېر زر د پام او اعتبار وړ وگرځو . مثلاً که کله درڅخه د يو څېز په اړه کومه مشوره وغوښتل شوه، نو پر خپل یو نظر ورکولو سره بسنه مه کوه، بلکې څو نظرونه ورکړه…دا به مو په ژوند کې تل د نورو څخه یو گام وړاندې ثابت کړي.

 

۲ – په اداره يا کارځای کې لومړی شخص اوسئ، چې د وخته حاضري ورکړئ، د یو مشهور سیاحتي شرکت مشر جېمز تورنتون James Thoronton وايي، چې تل هڅه کوم په خپل کار ځای کې له نورو وړاندې حاضر اوسم، دا کار ماته دا موقع راکوي، چې خپل ورځني کارونه مهالوېش کړم او خپل تمرکز پرې زیات کړم، خپل اضافي برېښنالیکونه پاک کړم او تل داسې انگېرم چې له نورو یو ساعت مخکې یم.

 

۳ – هره ورځ له خپلې کورنۍ په اړیکه کې اوسئ، بېلېن هان د څو نړيوالو هوټلونو څښتن دی، په دې اړه وايي:

«د کورنۍ سره اړیکه ماته یو ډول د تعادل احساس راکوي، زه په دې کیسه کې نه یم، چې چېرته یم، خو زه باید هره ورځ يو ساعت کورنۍ له‌پاره ځانگړی کړم، زه هر سهار د مېرمنې سره په خبرو پيلوم، کوچنیانو ته مې پېغامونه لېږم او په لمر لوېدا سره یو وار بیا د مېرمنې احوال اخلم.»

 

۴ – د شرکت يا کارځای مختلفو برخو ته مو سر ورښکاره کړئ، د MMGY د بازارموندنې شرکت رییس کلېټون ريډ په دې اړه لیکي، چې زه هره ورځ د خپل کاري ټیم مخامخ ليدل کوم، دا کار دې د پاره ډېر ښه وي تر څو د خپل شرکت د عملي چارو څخه په ښه ډول خبر شم.

 

۵ – تل هڅه وکړئ، خوښۍ‌بښونکی و اوسئ… که غواړئ، چې په هر چا گران واوسئ، نو سر د نن څخه د جديت ماده لرې کړئ، باور وکړئ، که هر ورځ په کارځای/ژوند کې کومه ټوکه وکړئ، او د نورو د خندا لامل شي، نو تاسې به تر ټول گران شخصیت و اوسئ!

 

۶ – اړيکې جوړې کړئ، موږ ټول څه نا څه هره ورځ نویو خلکو سره گورو، آیا کله مو فکر کړی‌دی، چې نوي ملگري جوړ کړو، همدا نوي ملگري مو کېدای شي، یوه ورځ ښه کارمند، ښه امر، ښه رییس، ښه گاونډی، ښه ټولگیوال، ښه ملگری يا ښه خپلوان شي. تل باید هڅه وکړو، چې په هر ځای کې د نویو خلکو په ليدو د هغوی سره د Network جوړولو په فکر کې شو.

 

۷ – بریا مو له یو بل سره تړلې ده، یو عالم پخوا ويلي وو، چې متحرک څيزونه او جسمونه به تل د «حرکت» لور ته تمایل لري او ساکن څېزونه به تل د «استراحت» لور ته تمایل لري، نو موږ د ژونديو موجوداتو په ډول اړ یو چې د کارونو په ښه ډول ترسره کولو له‌پاره له یو بل مرسته وغواړو، موږ باید هڅه وکړو، چې د هر کار نوعیت ته وگورو او بیا ورته بېلابېل ملگري/همکاران ولري، دا کار به مو په ژوند کې د سترو بریاوو پوړیو ته ورسوي.

 

۸ – ځیني شیان تل له‌ځانه سره ولرئ، د یو عالم په ویناوو کې مې ډېر پخوا لوستي وو، چې ویل، زه تل خپل موبایل او د پلي‌گرځېدا بوټونه ځان سره نږدې ږدم، موبایل د دې په خاطر که هر کله له استراحت پاڅېږم، نو زر يې گورم، چې د خپلوانو، ملگریو او یا له دفتر څخه کوم پېغام نه وي راغلی او بوټونه مې د دې د پاره ږدم، چې ورته گورم، نو تل پلي‌گرځېدا ته هڅول کېږم، اوس نو تاسې خپلې اړتیاوې وگورئ، ځينې ملگري تل له خپله ځانه سره موبایل او کتاب د استراحت پر مهال ږدي، ځینې بیا لپټاپ او ځينې بیا هم تسپې او جاي‌نماز.

 

۹ – تل ستونزې ته د فرصت په سترگه گورئ، ښايي ډېرو ته عجیبه واوسي، چې څرنگه یوه ستونزه، فرصت وگڼو، خو وار مه خطا کوئ، ځکه یو عالم وايي، چې هره هغه «ستونزه» چې تاسې ونه‌وژني نو فرصت دی، اوس نو فکر وکړئ، چې څرنگه يوه ستونزه په فرصت بدلولای شئ؟ او په اداري ژوند کې پیاوړي کسان/مدیران هم هغه دي چې ستونزو ته د فرصت په بڼه گوري.

 

۱۰ – خپله هره ورځ ترسیم کړئ، ښه به وي، چې په ناڅاپي ډول هېڅ ورځ تېره نه کړو، گورئ که تاسې چېرته د خپل ورځې له پلان خبر نه یاست، نو بریا به ناڅاپي خبره وي، که‌نه ناکامي مو ځان له‌پاره پلان‌شوې وگڼئ، هڅه باید وکړو چې هره ورځ له پيلېدا څخه وړاندې ۳۰ دقیقې کېنو او فکر وکړو، چې نن ورځ به څه کوم او پايله به يې څه وي!

 

۱۱ – د کارونو څارنه کوئ، خو د یو رښتيني مشر په ډول؛ د ادارو په ډېری مشرانو کې دا ستونزه وي، چې کوم کار خپله نه‌کوي، نو د نورو څخه يې ترسراوي جدي غوښتنه کوي، د معاصر مدیریت غوښتنه هم دا ده، که چېرې له لاس لاندې کارمندان لږ دقیق وڅارل شي او تر څنگ تشویقي یې رویه خپله کړو، نو ډاډه اوسې، چې ټاکل شوی کار، شوی وبولئ، تل په کار ځای کې د نورو سره په پراخه ټنده، مثبته رویه او نېک اخلاقو چلند کوئ.

 

۱۲ – نظرونو ته په خلاصه غېږه ښه راغلاست ووايئ؛ په ژوند کې به تل د نورو د نظرونو سره مخ کېږو، تل باید هڅه وکړو، چې د نورو نظرونو ته درناوی ولرو، او پلټنه وکړو، که چېرې رښتیا هم مقابل لوری په حقه وي، د نظر منښتې تر څنگ ترې مننه وکړو، چې نېک نظر يې شریک کړو، اوس دا نظرونه که چېري په کار ځای کې واوسي، نو هېڅ‌کله باید داسې ونه انگېرو که د چا د بدلون نظر ومنو نو اداره به ړنګه شي، کوښښ وکړو، چې پر نظر، نظر واخلئ، خپله به د تاييد او رد پايلې ته ورسېږئ!

 

۱۳ – هره ورځ خپلو کلیدي همکارانو سره خبرې وکړئ؛ د خپل کارځای/ادارې له کليدي همکارانو سره باید هره ورځ وويني، د دې کار له ډېرو گټو څخه یوه دا هم ده، چې د ادارې د تېرو ستونزو د حل او د شتو/راتلونکیو ستونزو څخه په ښه ډول خبرېږې، مخکې له دې چې د ستونزې سره ناڅاپي مخ شئ، لار او گودر درڅخه ورک کړي، ښه به وي، چې له وړاندې ورته چمتو والی ولرئ، تر څو راتلونکې/احتمالي ستونزه په ښه ډول سره په فرصت بدله شي.