دسولې عالي شورا باید څنګه وي؟


  • 8 مياشتي دمخه (21/09/2020)
  • روښان زرملوال
  • 208

دسولې ملي مشورتي جرګه دولت ته مشوره ورکوي او دخپل پریکړه لیک په دوهمه ماده کې وایي: دولت باید د سولې د پروسې د پیل لپاره د سولې د ملي مشورتي جرګې دپرېکړو په پام کې لرلو سره یو هراړخیز پروګرام جوړ او د سولی د تامین لپاره دوامداره برنامی د یوې ملي او دایمي ستراتیژۍ په توګه اعلان کړي
دسولې ملي مشورتي جرګې دبیلاابیلو کمیسیونونو په ځینو وړاندیزونو او طرحو کې هم دسولې دبهیر دګړندي کولو لپاره دسولې او پخلاینې دیوې دایمي شورا غوښتنه شوې وه ، په جرګه کې آن داسې نظرونه هم موجود و، چې دسولې او ملي روغې جوړې دتآمین لپاره دې دحکومت په جوړښت کې یو وزارت رامنځ ته شي.
درسنیو دخبرونو له مخې دولت دسولې د ملي مشورتي جرګې دپریکړو او مشورو دعملي کولو لپاره په پام کې لري دسولې سراسري عالي شورا جوړه کړي. او په دې اړه لومړنۍ مشورتي غونډه دغبرګولي په څلیرویشتمه نیټه جوړه شوه.
په دې غونډه کې بیا هم هغه څیرې ډیرې ترسترګو کیدې چې په تیرو تنظیمي جګړو کې یې برخه لرله. دسولې په ملي مشورتي جرګه کې دهمدغو څیرو موجودیت او برلاسي تر ديره حده خلک ناهیلي کړل او خلکو ددغې جرګې په پریکړو او دحکومت په نیت هغه وخت شک پیدا کړ چې دتیرو جګړو مشهورې څیرې پکې برلاسې او دهغوی یوتن یې دجرګې مشر کړ.
طبعي ده چې د دغو څیرو په لیدو سره دهر سړي ذهن ته دتیرو جګړو ترخې خاطرې راځي ټول پوهیږي همدغه کسان وو،چې په بیلابیلو بهانو یې په وطن او کابل ښار کې دجګړو لمبې تازه ساتلې. دغه کسان په جنګي ډلو پورې تړلي کسان دي چې کلونه کلونه دخپلو ګټو لپاره جنګیدلي دي .
اوس چې دولت په پام کې لري دسولې دملي مشورتي جرګې دپریکړه لیک او مشورو دپلي کولو لپاره دسولې عالي شورا جوړه کړي باید تیرې تجربې تکرار نه کړي.
 تردې دمخه موږ دمشرانو جرګې دریس حضرت صبغت الله مجددي په مشرۍ دسولې او ملي پخلاینې په نوم دې ورته یوه اداره لرله چې په دې برخه کې یې کار کاوو سره له دې چې حضرت صاحب دهغو کسانو له ډلې څخه نه و، چې دکابل ښار په کور ورانوونکو جګړو کې دې یې برخه اخیستي وي او ډیرو ته هغه دیوه منځګړي شخصیت په توګه دمنلو وړ و.خو لکه څنګه چې لازمه وه دغه کمیسیون پخپلو کارونو کې ډیر بریالی نه و، او دخپل کار زیاته برخه یې یوازې دبندیانو خوشي کولو ته ځانګړې کړې وه نوردسولې دتآمین په برخه کې ددغه کمیسیون رول ډیر څرګند نه بریښیده.
دولت ته په کار ده دسولې په ملي مشورتي جرګه کې په تیرو جګړوکې دښکیلو کسانو دشته والي په اړه دخلکو غبرګون ته توجه وکړي او له بلې خوا په دې برخه کې دتیرکمیسیون کارونه هم وارزوي او بیا دنوې عالي شورا دجوړولو لپاره ګام پورته کړي.
دولت باید دې ته توجه وکړي چې دجنګ خلک سوله نه شي راوستلای که خدای ناخواسته دسولې په عالي شورا کې بیا هم هغه څیرې زیاتې برلاسې وي چې په تیرو جګړو کې یې برخه لرله فکر نه کیږي چې دا وړۍ به شړۍ شي. دغو کسانو ته هغه څوک چې اوس یې ټوپک په لاس کې اخیستی او جګړې کوي ددښمن او دجګړې دیوه لوري په سترګه ګوري. که هرڅومره ددوی یوشمیر پخپلو مخونو دسوله غوښتونکی او ملي شخصیت پرده وغوړوي بیا یې هم څوک نه مني.
ویل کیږي دافغانستان او پاکستان ترمنځ دامن دجرګې د ناکامیوله لاملونو څخه یو لامل داو، چې دافغانستان له لوري یې داسې یو څوک مشر و، چې دتیرو لسزیزو په جګړو کې یې برخه لرله او دسولې له ملي مشورتي جرګې څخه دخلکو دسوړ هرکلي یو لامل هم ددغې جرګې دمشر او په دې جرګه کې دجنګي ډلو دمشرانو شته والی و.
نو په کار ده زموږ ددغې ملي سراسري ستونزې دحل کولو لپاره نورې ملي څیرې او هغه کسان چې لږتر لږه یې په تیرو جګړو کې ونډه نه وي لرلې ،رامخته شي تر څو خلک ددغه بهیر په رښتیاینه باور پیداکړي او په هیواد کې دجګړو او بې اعتمادیو دله منځه وړلو لپاره لاس په کار شي.
خلک هیله لري دسولې دعالي شورا په جوړښت کې تیرې تجربې تکرار نه شي او له نویو سوله غوښتونکو،ملي او وطندوستو شخصیتونو څخه متشکله وي.