لومړی پاڼه زموږ هدف کتابتون د ماشومانو لپاره انځورونه سندرې مرکې په غږ کې
سمسوراوبپاڼه  
خپلواکه، ټولنیزه او فرهنګی خپرونه
 
 
نوی شعرونه
31.05.2018 د ښاغلي عبدالمعروف سباوون شعرونه 28.05.2018 د ښاغلي مفتون مسيد شعرونه 15.05.2018 د ښاغلي صميم مضمون شعرونه 09.05.2018 د ښاغلي غزت الله ځواب شعرونه 24.04.2018 د ښاغلي شرر ساپي شعرونه 27.03.2018 د ښاغلي فریدون فطرت شعرونه 22.03.2018 ښاغلي حيران شينواری شعرونه
 
غزل
  نېټه: 16.03.2018  
انځور دی ! انځورونه دي په خاورو کې پراته 
انځور دی ! او سرونه دي په خاورو کې پراته

انځور دی ! څوک لیکوال د ډیوګۍ رڼا ته ناست 
انځور دی ! کتابونه دي ، په خاورو کې پراته

انځور دی ! په پرېوتو دیوالونو مرغۍ ناستې
انځور دی ! تنابونه دي، په خاورو کې پراته

انځور دی ! یو ماشوم د دروازې غاړه کې پروت 
انځور دی ! ګلابونه دي ، په خاورو کې پراته

انځور دی ! یو سړی دی د صحراپه لور روان 
انځور دی ! او خاپونه دي، په خاورو کې پراته

انځور دی ! یو څو پیغلې په سینګار باندې لګیا 
انځور دی ! سره لاسونه دي، په خاورو کې پراته

انځور دی ! تور ټوپک دی د حجرې کونج ته ولاړ
انځور دی ! چیلمونه دي ،په خاورو کې پراته

انځور دی ! ملا ناڅي او ساقي تسبیح په لاس 
انځور دی ! تش جامونه دي، په خاورو کې پراته

انځور دی ! یو شاعر له خپلې ژبې را ځوړند 
انځور دی ! ایاتونه دي، په خاورو کې پراته

انځور دی ! په هندارو دي پراته دوینو څاڅکي
انځور دی ! ګل مخونه دي، په خاورو کې پراته

انځور دی ! یوه مور د بچي پښې ښکلوي ژاړي
انځور دی ! جنتونه دي، په خاورو کې پراته

انځور دی ! ستا حېران ! پکې له تانه جدا کیږي
انځور دی ! ارمانونه دي ، په خاورو کې پراته
 
بېرته شاته