لومړی پاڼه زموږ هدف کتابتون د ماشومانو لپاره انځورونه سندرې مرکې په غږ کې
سمسوراوبپاڼه  
خپلواکه، ټولنیزه او فرهنګی خپرونه
 
 
نوی شعرونه
11.09.2018 د ښاغلي غازی نادان شعرونه 19.07.2018 د ښاغلي بهار عیار شعرونه 18.07.2018 د ښاغلي نصرت الله سرور شعرونه 13.07.2018 د ښاغلي اکبر سيال شعرونه 31.05.2018 د ښاغلي عبدالمعروف سباوون شعرونه 28.05.2018 د ښاغلي مفتون مسيد شعرونه 15.05.2018 د ښاغلي صميم مضمون شعرونه
 
جانان ته ( نظم)
  نېټه: 11.03.2018  
څومره دي خوږ دى ښکلى نوم جانانه
څومره په زړونو باندې ښه لګېږي
زموږ د زړه د باغ پر هر ګلبوټي
لکه سپرلى لکه اوبه لګېږي

__

موږ تشې سترګې يو نظر مو نشته
موږ ته چې کله دا احساس راکوي
چې په ړنو سترګو جهان وګورو
دا ستا له نوره انعکاس راکوي

--

موږ چې له ژونده څخه ستړي شو لږ
زموږ و زړونو ته سکون راکوي
ټول نفرتونه لکه اور لمبه کړي
پاس له اسمانه يو قانون راکوي

--

د خوشحالۍ او د ښادۍ ورځو کې
دا ستا په نوم هره سندره ليکو
چې ورځ د غم او د خفګان راشي بيا
ستا په نامه هره خبره ليکو

--

ماښام په ستورو کې ځلېږې راته
سهار په سترګه د سبا کې راشې
کله په سترګو د تصوير راګورې
کله په سترګو د شهلا کې راشې

--

ستا له فرمانه څخه نه شي وتاى
هره يوه ژبه په واک کې اخلې
کله چې وغواړې خبرې وکړې
زموږ د زړه ژبه په واک کې اخلې

--

جانانه ته زموږ له زړو نه جوړ يې
د يوه راز غوندي پېچلى ښکارې
د دې نړۍ د هر بشر برخه يې
د سپين قران غوندې ښاغلى ښکارې

--

په تا تړلي يو موږ ټول جانانه
مقصد مو ته د زړه ارمان مو ته يې
په يوه خوله ستا ښکلى نوم يادوو
منزل مو ته يې او جانان مو ته يې

--

نو خود به ښکلى وي ستا نوم جانانه
څومره په زړونو باندې ښه لګېږي
زموږ د زړه د باغ پر هر ګلبوټي
لکه سپرلى لکه اوبه لګېږي
 
بېرته شاته