لومړی پاڼه زموږ هدف کتابتون د ماشومانو لپاره انځورونه سندرې مرکې په غږ کې
سمسوراوبپاڼه  
خپلواکه، ټولنیزه او فرهنګی خپرونه
 
 
نوی شعرونه
11.09.2018 د ښاغلي غازی نادان شعرونه 19.07.2018 د ښاغلي بهار عیار شعرونه 18.07.2018 د ښاغلي نصرت الله سرور شعرونه 13.07.2018 د ښاغلي اکبر سيال شعرونه 31.05.2018 د ښاغلي عبدالمعروف سباوون شعرونه 28.05.2018 د ښاغلي مفتون مسيد شعرونه 15.05.2018 د ښاغلي صميم مضمون شعرونه
 
د سولې په هيله
  نېټه: 11.03.2018  
د تخليقونو ستر واکمن خاونده
ټول کاينات دي پر ارامه اوسي
ستا د تخليق يوه حصه ده مګر
چې پر دې سيمه نا ارامه اوسي

--

نارينه نشته ټوله جنګ ته تللي
ستا د تور سرو سوال قبلېږي کنه؟
چې د شاهين له پنجو ځان وباسي
د دې کوترو سوال قبلېږي کنه؟

--

د يوه وران کاله په وره کې ولاړ
ښکلى ماشوم واړه سوالونه لري
غواړي دعا ستا په طرف ولېږي
مګر نه لپي نه لاسونه لري

--

يوه درنه يوه سپېڅلې پېغله
راځي په اوښکو يې لمانځنه کوي
د يوه ځوان په پښو کې ځان غورځوي
د تللي ورور ورنه پوښتنه کوي

--

چې غوړېدلې نه وي ورژېږي
پر ګل غوټۍ دي زړه خوږېږي کنه؟
بيرته چې باسې يې په سره ډولۍ کې
پر ناوکۍ دي زړه خوږېږي کنه؟

--

د شا زلمو څوڼې خو وسوځېدې
کور مو سوځېږي بورجل اور اخيستى
اوس مو د لېچو بنګړي شرنګ نه لري
پاس پر تندي مو اوربل اور اخيستى

--

پر سر يې تور دېوان ولاړ مصلح
زموږ د امام په تن زخمونه لګي
دا ستا په کور کې امن پاته نه شو
پر منارو يې راکټونه لګي

--

نو اى د سترو قدرتو خاونده
و موږ ته سوله راکړه سوله راکړه
چې مو سجدې په کې کافري نه وي
نوى ژوندون له نوي روله راکړه

--

نارينه نشته ټوله جنګ ته تللي
ستا د تور سرو سوال قبلېږي کنه؟
چې د شاهين له پنجو ځان وباسي
د دې کوترو سوال قبلېږي کنه؟
 
بېرته شاته