غزل

څو بدرنګ چې غنمرنګ په پيسه اخلي

ښايستونه دي، چې زنګ په پيسه اخلي

زمونږ ښار د متضادو مجموعه ده

ځينې سوله ځينې جنګ په پيسه اخلي

د زړګوټو دنيا رنګ د وينې غواړي

زمانه ده، چې بس رنګ په پيسه اخلي

له ها ځاى نه د ښکلاوو لوګر راشي

مينه رېبي، شوخ وشنګ په پيسه اخلي

نور همه د زمانې مغل ته خم دي

يو خوشحال دى، چې اورنګ په پيسه اخلي

د ننګونو تبليغ دلته بې مانا دى

دلته خلک شته، چې ننګ په پيسه اخلي

دسمسور په ويبپاڼه کې ټول خپاره شوي او خپرېدونکې لیکنې او شعرونه د ليکوالو پورې اړه لري. دسمسور  ويبپاڼه يې يوازې د خپرېدو وسيله ده، ملتيا يې ورسره نه لرې.